「咁大件事？歐錦棠數完無記之後，竟然公開連自己老婆都數埋，仲要鬧佢唔係人？兩公婆唔啱講到啱，因乜搞到咁僵？」
各位稍安勿躁，《一言棠》風格向來一文二用，略帶譁眾取寵，些微公器私用，話我老婆唔係人，雖然絕對是有感而發，擺明針對，但大家切勿只看字面一層。首先，講到「唔係人」嘅人，喺地球排隊繞一百個圈都未輪到我老婆斯敏；其次，我《一言棠》從來唔鬧人（？）係，你哋冇睇錯，我從來唔鬧人，因為畀得我鬧嗰啲一定唔係人。再者，連月頻頻被「包容」、「求同存異」、「凝聚共識」等字眼洗腦有功，加上近日總理一錘定音，原來就連「人權」一事，不同國家對此都有不同認識，而在中國關於人權的內涵更加是豐富的……云云，我聽後心胸視野有如撥雲見日、豁然開朗。
太在意你便輸了
中國文化淵博高深，所有詞彙皆有多重意義及解釋，字眼係咁意思並不代表係咁，好多事情，太在意你便輸了，試舉例如下，不喜勿插：「共產黨是偉大的」……OK，姑勿論你認同共產主義與否，她原始的理念確是偉大的，後來加上實踐，更證明無論在摧殘文明、踐踏人倫、扭曲文化等等的作用上都是空前的，和顯著的，所以，「偉大」這字眼的內涵，又要分到底是從魔鬼抑或常人的角度出發，全世界咁多共產黨，阿律師大袋……唔係，係大代表冇講明係邊處嘅共產黨吖，所以大家切勿胡亂對號入座。以此推斷，早前被拍到入殘廁搞嘢之所謂「唔係知名人士」（佢自稱），大有可能是在廁格內以雙身法練習方法演技，以至聲色齊放，而並非大家心起歪念的「吉嘢男女」。
講咁耐，究竟我老婆如何不是人？是咁的，話說自從排練舞台劇《聖女．貞德》這數月以來，她身兼多職，無論在訂購物資道具、議價、會計、統籌、宣傳策劃、聯絡……等等，事無大小她一手包辦，請勿忘記她飾演女主角貞德，接近兩小時的劇本她的台詞就佔了大半，為鑽研角色月來更幾達不眠不休，臨近演出，票務之事繁忙，尤其票友加票、改票等瑣事時而有之，她每晚排練回家例必為此親自仔細安排直到夜深，看着她勤奮專注工作的背影，我就莫名的感動，所以，我娶的老婆怎可能是人？她簡直是女超人！（這句請按照字面解釋）儍人娶得女超人，就成為世上最幸福的人。
今晚開show了，最讚的「貞德團隊」，加油！Good Show！
【一言棠】
撰文：歐錦棠
除表演藝術，也酷愛文字、影像及武術，其文章往往一針見血。
本欄逢周五刊登
【我撐公投】毅行直播
網頁: http://622popvote.appledaily.com