要進攻立法會，方法很多，首先要選一個防守比較弱的門口進攻。
立法會有兩個入口，一個是直選入口，一個是功能組別入口，做賊也知取易不取難，首選「功能組別大門」。
功能組別的入口也分有不同的保安程度，教育界、衛生服務界這些組別，選民也有六七萬人，反正比特首的689為多，不易攻破。
漁農界保險界等等入口門檻甚低，只有區區100多名選民駐守，連低能兒童，即是能力好低的兒童，都能進入，相當抵玩。
建議進攻入口：金融界，此入口設置自動門，自出自入，沒有看更沒有實Q，一位叫吳亮星的人辦便是循金融界別的自動門，一聲唔該，門都無推一下，自動當選，汗都無滴就攻咗入立法會大樓。
由此路攻入立法會，要輕裝上陣，個人物品例如良心、廉恥等等，記得放下。
若你由功能組別大門攻入立法會，便要馬上布陣，唔駛用竹枝唔駛用鐵馬，呢啲唔work㗎，識用嘅，一定用「分組點票」嚟防守，有咩風吹草動死人塌樓，就匿係「分組點票」後面，就可以「以一當百」，無人可以埋到你身。
如果你要由「直選入口」進入立法會，嗰度布防比較嚴密，好多選民把守，建議可以投擲物品，撞開裂口……唔係擲石仔唔係擲乾冰，係擲「蛇齋餅糭」，應該可以殺到一條血路。
入咗立法會你就可以自由發揮，寫大字又得，同AO打龍通照劇本讀又得，練下核突英文又得，唔出席唔發問唔提案又得，出賣選民違反政綱包庇高官放生政府，呢啲更加係指定動作。
香港呢個社會好奇妙㗎，只要議會有人返工，佢地就覺得個議會係運作緊㗎啦。
進攻立法會，靠你地啦！