有讀者不明「字裏行間；感受到當事人根本對你的建議聽唔入耳；陽奉陰違；由始至終根本冇改變過！唔明你點解咁有耐性嘗試點化佢？」很簡單，犯同樣錯誤的人太多，當局者迷錯而不知。不信？請看以下讀者的迴響。
「Son姐，今日睇咗你《蘋果》篇文，完全好似自己的寫照，我都經過自怨自艾的日子，自己做到隻積咁，另外嗰個講兩句老細就聽晒，人工又低。越做越唔開心提出請辭，老細一句留的說話也沒有，當下心都實埋，做生做死咁多年，得來只有如何安排請人接手！離開後回頭再看，其實自己確實唔係一個理想的員工，十句頂九句，仲要最常講『嗱都話咗㗎啦』，係人都唔鍾意啦！現時返新工，時常要提醒自己唔好再犯同樣的錯，唔係你幾搏命為公司都好，到頭來都係要走人。不好意思，看完你的文章有感而發，跟你分享一下。謝謝！」
「Son姐，很喜歡你的文章，每每使我會心微笑及有所反思，文章中的主角，實在有點似我。由於工作於中小企，有幸升至一人之下萬人之上的位置。每當對着老闆時必會戰鬥格『據理力爭』，老闆必會話我駁嘴駁舌。幸好老闆也肯聆聽，有時也會接納我的意見，所以即使人工福利一般，但也在這職位上做了3年。
「上個月剛給了老闆兩個月通知離職，文章主角的問題，老闆也有提及及叫我要改善，如不改變的話他日難以繼續向上游，即使工作熱情爆燈也不能彌補個人態度而產生的失誤。
「剛剛看到這篇文章的上中篇，開始有點明白我老闆說的話，也開始害怕自己也會像文章主角這樣冥頑不靈多年後也沒有改善，我想我要裱起這上中下篇反思了。」
張慧敏
http://www.facebook.com/HKcareerdoctor