呢幾日中環ifc商場好熱鬧，事關一間喺ifc新開冇耐嘅美國時裝品牌喺嗰度舉行推廣活動，搵嚟大約10名靚仔，朝十晚七，向商場顧客同埋中環OL大派飲品、朱古力、macaron、鮮花等等；活動去到呢個星期日（22日）。
呢個時裝品牌前日開始安排四架勁似美國紐約街頭成日見到嘅熱狗販賣車，每架髹上唔同顏色。重點係每架車都有一至兩名靚仔坐喺入面，向大家派飲品或小甜點。
呢班靚仔唔係時裝店售貨員，亦唔係模特兒，而係公司專登請嚟嘅一班侍應，中午食晏時間，輕易吸引大班OL排隊攞小禮物。但效果當然唔及另一美國品牌Abercrombie＆Fitch（A＆F）兩年前喺中環畢打行開張，搵班肌肉型男駐場多日，搞到好多OL行過咿嘩鬼叫咁震撼喇。