今屆世界盃有四隊代表亞洲，就係澳洲、日本、南韓、伊朗，四隊都難有機會捧盃，能夠進入十六強，已經係有交代。「紐約時報」嘆息，佔咗全球人口三分之一嘅中國、印度，加埋印尼，都無緣出戰世界盃，未免令世界盃之世界性受到影響。咁又未必，除咗印度十二億人對足球冇乜興趣，只顧英國殖民地政府遺產板球之外，中國與印尼人都係足球粉絲，只係國家隊實力弱，冇得好講。英國人有兩大體育貢獻，就係將板球與足球規則化、規範化，但點解印度人只愛板球，不熱中足球呢？左丁山就唔明白，其實足球更加工人階級，夠藍領，不似板球咁樣有貴族階級味道（例如一場比賽打成日，仲有tea time休息時間），與印度窮人多嘅社會，唔多協調啫。
中國冇乜體育國技，乒乓係毛澤東時期催谷出嚟嘅政治產物，其實中國人最鍾意嘅球賽仍然係足球，習近平係足球迷，馬雲許家印懂得足球政治，合盟經營廣州恒大足球俱樂部，可算體會領袖苦心，不計金錢，咁就有得諗嘅！馬許二人不妨訂下長期目標，以西班牙為學習對象（因西班牙人與中國人體型相近，巴塞與皇馬都冇乜高大球員，沙維、恩尼斯達、法比加斯、美斯等球星身材，與廣東人差不多），徵召窮家子弟，由八九歲開始訓練，分U13（十三歲以下）、U16、U19三大組一路練上去，搵巴西阿根廷西班牙教練訓導基本技術，德國教練訓練體能與紀律，遊說其他球會（包括香港球會）效法，組織全國青少年聯賽，每年去巴西、西班牙培訓一次，最有前途嘅十七八歲球員就送去歐洲打聯賽，必要時（馬雲有的是錢），買入一隊英格蘭球會（如西布朗、阿士東維拉之類），一隊西甲臨近破產球會，每年輸送青年球員去呢啲球會受訓及比賽，增加實戰經驗，如是者十年後，中國國家隊或有足夠23個選手可與日韓澳伊四強爭一日長短，爭取到世界盃入場券啩。呢啲叫做以錢搭夠，唔駛多，馬雲閒話一句，或習近平召見土豪講三句，集資一百億元人民幣，話咁易啦，強國人一年到晚到歐洲掃貨，李克強見一見英女皇，就簽下訂單逾三百億美元，出手豪爽到極，係咁意用百幾二百億人民幣嚟培訓出一個世界盃參賽權，抵到極！（按：BBC於六月十六日有長文報導比利時如何培訓出當今黃金一代球員，值得內地參考。）