今年世盃回歸三色台，一眾球迷都好開心，因為有免費波睇之餘，仲有好多大家都未必講得出叫咩名嘅藝員喺賽前玩遊戲。最不得了就梗係一班藝員同大家講波經啦，咁先證明世界盃真係哄動全港吖嘛，連唔識波嘅人都會突然走出嚟，同觀眾朋友講支持巴西，因為有主場之利，犀利！
播剩5場 8強再續
不過我求大俠喺度提提大家，三色台應承大家喺免費頻道嘅22場波，已經播咗17場，今晚開始唔會再有免費波睇，要到7月4號之後，三色台先再施捨幾場波畀我哋呢啲無錢「上台」嘅窮人睇。
Sorry講錯咗，應該係國際足協施捨畀我哋先啱，因為免費播22場都唔係三色台嘅意願，其實係國際足協嘅規定嚟。成日口口聲聲話「公眾利益」，其實買完直播權番嚟，咪又係放喺收費台。值得一提嘅係，支持阿根廷嘅朋友，唔好意思喇，分組賽3場都冇得免費睇，求神拜佛望佢哋打入8強，都仲有機會喺免費台亮相嘅。
商場茶記仲好氣氛
如果想繼續睇世盃，但又唔想簽幾年約，逼住裝個世盃完咗得番啲冇乜嘢睇嘅收費台，都唔係冇辦法嘅。其實近幾屆開始，好多商場都會直播世界盃賽事，我求大俠喺06世盃，都係喺商場同一大班波友，見證住施丹攞佢個光頭撞埋去馬達拉斯度。嗰一幕令全場「嘩」晒，氣氛唔會差得過入大球場睇住啲球員炒飛機後，俾千幾個阿伯一齊「X」。傳統啲嘅方法，可以去酒吧或者茶記，呢兩個地方勝在有嘢食有嘢飲。不過，最好問清楚佢哋會唔會有直播先，因為同三色台買商業播映權貴，又逼人簽幾年約，所以唔係間間酒吧茶記都肯裝。
至於近年喺鴨記好賣得嗰隻機頂盒，我求大俠就奉勸各位球迷唔好試買嘞，始終都有機會觸犯法例嘛！
識睇 一定睇蘋果嘅足動世盃：
http://worldcup2014.appledaily.com/