世界盃真係越睇越精采！我就喺星期二晚一口氣睇晒兩隊愛隊巴西同比利時，可惜兩隊都交唔足貨，希望嚟緊踢得肉緊啲啦！不過除咗睇波、睇球星外，我發現今屆世界盃仲有好多新奇嘢畀我哋球迷去發掘。
好似望落成支剃鬚膏咁款嘅「消失的噴霧」，佢專係畀球證喺罰球嗰時用嚟mark低人牆同罰球點嘅位置，而嗰晚睇比利時嗰陣，有一幕球證喺度噴罰球點，唔知係咪太出力，搞到成對波砵都係「消失的噴霧」，嗰球罰波比利時又咁啱開得好衰喎，咁嘅情況真係睇到笑咗囉；我噚晚沖涼，都有玩吓「消失的噴霧」㗎（圖）。
雖然個罰波失手唔知關唔關噴霧事，但我就幾buy呢個設計，如果用埋喺我哋嘅比賽度就真係掂喇！平時比賽啲人要幾茅有幾茅，一有罰波，啲人牆實博晒大霧，趁球證睇唔到就係咁行前，次次離球都冇10碼，如果有呢支嘢就要企硬喺條線上面，計我話不如將呢個發明用埋響開界外球度，等啲茅躉唔使用同樣招數出蠱惑。晚晚睇咗咁多場波，自己球季又完咗，冇可能齋睇唔踢㗎，真係要落街踢番兩腳先。
文﹕陳子樑
識睇 一定睇蘋果嘅足動世盃：
http://worldcup2014.appledaily.com/