近期世盃熱話除咗荷蘭大炒西班牙外，應該係早幾晚德國對葡萄牙果場波啦！對支持葡萄牙嘅球迷嚟講，絕對係個好傷痛嘅夜晚，我亦係其中一個。為咗支持我深愛嘅C朗，我仲專登早一日溫好書，諗住撐場。唉！點知葡萄牙最尾輸咗4粒，完場見到C朗想喊咁款，真係睇到我好心痛。
喺網上見到啲巴打PS咗C朗張相，仲key埋「不怕神一樣的對手，只怕豬一樣的隊友。」真係好應景，即時諗起比比無啦啦攞個頭頂咗湯馬士梅拿一下，搞到直紅出場，大佬呀！家陣對德國，唔係對埋啲咩魚腩，做咩咁睇唔開先得㗎。跟住法比奧干查奧傷埋，踢少兩個主力，其他球員又唔識踢波咁，一攞波就畀番對面，C朗識飛都冇用啦！1打11咩？睇到我都躁咗，何況係C朗呢！下場冇咗比比呢個「豬頭」實贏！
𠵱家隊波搞到咁，最需要球迷不離不棄嘅支持，希望佢哋重新振作，踢番啲好波。至於我都有位女球迷喺背後支持我，呢個就係我家姐（右），佢今次喺我踢足總盃嘅8強到決賽，每場都嚟撐我。應承妳！以後會有更多、更多嘅冠軍同妳分享！多謝妳！文：許家樂
識睇 一定睇蘋果嘅足動世盃：
http://worldcup2014.appledaily.com/