街霸Ken：
德叔，呢排茶餐廳生意好差咩，係自由行大減，定係業主加租呀？
德 叔：
啋過你把口，我間茶餐廳生意不知幾好，我只係計吓噚晚巴西累我輸幾多。
肥 頭：
你上次唔係講，買1注就瞓覺，等第二朝睇有冇錢收㗎，條數好易計啫。
德 叔：
就係俾你班衰神笑完，噚晚睇巴西對墨西哥，晏晝已經買咗注上盤，唱國歌嗰陣見尼馬喊晒口，咁有鬥心，開波前加多1注，見嗰個咩咩施華都有頭槌，結果係咁加注，加加埋埋輸足幾口。
艇仔張：
咁又好難怪，巴西都算有士氣有鬥心，不過遇着墨西哥有個神龍，點射都救出嚟，真係吹漲。
肥 頭：波喪哭完，德叔之後嘅比賽又點睇先。
德 叔：
意大利第1場咁勁，第2場對住哥斯達黎加，梗係追上盤啦。
艇仔張：
德叔，你又追強隊連勝？真係要小心啲喎，哥斯達黎加第1場都反勝烏拉圭，並唔係弱旅嚟，加上天氣炎熱又踢早場，真係啱晒呢啲中北美洲球隊。
肥 頭：一個要上，一個要下，即係點呀？
艇仔張：
唔賭勝負都可以賭大細，今屆世界盃入波多，早場已經連續5日開大，追大都好㗎。
識睇 一定睇蘋果嘅足動世盃：
http://worldcup2014.appledaily.com/