「SING之天使」Coffee殘廁肉搏事件中，男主角被爆係達利國際（608）太子爺林知譽（Will Lam），今年4月先升任做執董，咁快就因疑似被人擺上枱而多一個「殘廁男」名銜，實在唔忍心再抽水。不過今次事件，就令菲菲望一望隻股，先發現禾桿冚珍珠。
首先，達利國際成立36年，專營高檔男女真絲產品，包括梭織、針織、時裝便服、內衣系列、領帶服飾和絲綢家紡產品，知名大客多到數唔晒，你講得出嘅都係，好似Columbia、CK、ZARA、Muji、DKNY等。公司旗下亦擁有四個品牌，包括Theme。
業績方面尚算穩定，最近五年，只係得前年錄得盈利倒退逾三成，而上年亦已扭轉頹勢，全年賺1.94億元，按年增14%。另外公司派息疏爽，上年派20仙，再早三年派18至22仙不等，以現時股價計，派息率高達7厘，林知譽一家人單係收息都收到手軟，「超級富二」絕非浪得虛名。達利同時擁有唔少物業，NAV有8.9元。磚頭值錢，加埋業務不錯，派息又好，但市賬率得0.3倍，歷史市盈率4.6倍，係全行最低嗰一兩間，論股價，真係抵到爛。可惜嘅係，大股東林富華，即係林知譽父持股50.72%，隻股成交極低，以噚日最後買賣掛牌價，差價足足20格，反映街貨少過香港殘廁數目，如果你而家有貨，值得去買杯咖啡賀一賀。
Fifi
http://www.facebook.com/lovefrystock
本欄逢周二、四刊出
【我撐公投】毅行直播
網頁: http://622popvote.appledaily.com