本欄在4月26日及27日提及法國經濟學家皮格提Thomas Piketty之暢銷新書「廿一世紀資本論」，話一書難求，賣到斷市，上星期仍在紐約時報暢銷書榜（非小說類）排第三，排第七嘅係新書Think Like a Freak，前十名暢銷書有兩本係由經濟學家寫嘅，可算異數。記者B人在紐約，係Think Like a Freak作者聘用嘅研究員，特別用空郵將兩本書寄過嚟香港，左丁山幾日前收到，見到本Capital厚成七百餘頁，想話讀晒嘅話，要重新安排過每日工作日程至得。
6月13日本欄講及皮格提之解決財富分佈不均嘅方法係抽更累進之入息稅及財富稅。一位讀者R讀後大動肝火，寫電郵批評左丁山如下：「在美國，long term capital gains tax只有15%，而income tax bracket $8,000以上已經收15%，最高到39.6%。Warren Buffett交的稅率比他請的秘書還低。你草草下的結論──『大大修改稅率，又會動搖經濟結構，影響整體增長，傷害工人階級』，是如此無知。加稅是傷害靠資本增值的人，不是靠工作收入的中產。資本家投資，不會被政府的稅率高低左右，而是這個投資的回報率。所以即使加或減capital gains tax，資本家還是要投資。如果左丁山不懂經濟，請不要在蘋果亂寫。」
這位讀者R話增加資本增值稅不會損害投資，攞嚟拗頸啫，書本上講嘅回報率，恒常講除稅後回報率（rate of return after tax），如果投資回報率係10%，抽一次資本增值稅（15%），稅後回報率就係8.5%，如果稅率係39.6%，稅後回報率會降低為6.04%。香港直情冇資本增值稅㖭，某國增值稅及財富稅（不限於股票投資）如果大加，資本家必然削減投資，往稅率較低國家設廠，此乃不易之理，故此皮格提建議全世界國家一同行動，等啲資本家無可逃避，不能將啲錢搬來搬去。呢啲係標準「空洞派掌門人」嘅講法，或是書生空議論嘅典型，因為世界稅務標準絕難統一，淨係叫英國完全跟隨美國稅制稅率，已是痴人說夢。香港在1960年代不願取消利息稅，結果造就咗新加坡成為亞洲美元中心，吸引晒全亞洲之離岸美元存款，夏鼎基在70年代初糾正錯誤，主動取消利息稅，香港先至可以與新加坡競爭成為金融中心咋。
識睇 一定睇蘋果嘅足動世盃：
http://worldcup2014.appledaily.com