𠵱家喺荔枝角收押所坐緊政治監嘅長毛梁國雄今次可謂犧牲大，除咗被迫變短毛，同埋冇得參加6.22全民投票同7.1遊行外，身為標準球迷嘅佢仲冇得睇四年一度嘅世界盃，晚晚對住月光「坐波監」。
每日得一個鐘放風
有懲教署阿Sir同八方講，雖然今屆世界盃無綫免費台會播22場賽事，但無綫一早同懲教署講明因為版權問題，懲教署唔可以錄播畀在囚人士睇，佢哋只可睇直播，但今屆比賽時間絕大多數都係半夜三更甚至清晨，能夠配合在囚人士作息時間嘅賽事只有剛過嘅星期日早上9點科特迪瓦對日本。但懲教署為免助長賭風，唔畀在囚人士睇直播，即係話佢哋只可以睇無綫重播嘅賽事精華片段。
長毛仲慘，連賽事精華片段都冇得睇。點解？因為長毛要求單獨囚禁，除食飯外，每日只有一個鐘到操場放風食煙，其餘時間就留喺冇安裝電視機嘅囚室度，冇得睇波。人人都知道在囚人士喺監獄要工作，八方問阿Sir長毛負責乜工作，答案係：「黐信封」。
提到長毛被剪髮變短毛唔開心，阿Sir話其實在囚人士可以選擇唔剪髮，但就要接受懲處，即係冇得揀啦！阿Sir話長毛當日剪髮好合作，並冇不滿；至於邊個操刀剪長毛把秀髮，原來係接受過剪髮技巧訓練嘅在囚人士。
李八方
mailto:[email protected]
識睇 一定睇蘋果嘅足動世盃：
http://worldcup2014.appledaily.com/