新世界發展（017）私有化新世界中國（917）的交易，昨出現戲劇性發展。在新中的法院會議上，雖然按股數計，議案獲股東壓倒性支持；但在俗稱「數人頭」的關口上，卻因出席的反對股東「人頭」較多，故議案最後遭否決，情況和早前恒盛（845）一樣。
新中向來都係一間「有資產、無管理」的公司，多年來hea得極之緊要，無論股價、成交都長期低迷。難聽啲講，揸得新中股票嘅，都係想博私有化！每股6.8元的作價，雖然唔算好慷慨，但較公司歷史水位來講有顯著溢價，照計對小股東來講，應有一定吸引力。
今次在人頭票上輸得咁緊要，令海迪不禁有啲陰謀論：係咪有人存心玩嘢呢？2009年電盈種票案，當年就係有人為避免出現輸「人頭票」的狀況，事前拆票以增加勝算。呢一招其實調返轉來玩，亦一樣work。向來熟悉財技運作、有大量賓架、財顧湊住嘅新世界系，今次居然喺呢個關節位上蝦碌，海迪只能夠講句：純官份人，有時又真係幾「純品」。
海迪的同事笑言，純官現時應該要唱返首「問誰未投票？」來抒發他此刻的心情。其實選用「公開要約」（General Offer）的方式來做私有化，應該就最公平，亦不會出現「人頭票」的問題；不過這方法通過的門檻較高，要達90%股東贊成，這意味在作價方面，就無空間可以錬得咁盡了。
海迪
識睇 一定睇蘋果嘅足動世盃：
http://worldcup2014.appledaily.com/