早排楊千嬅接拍咗陳木勝監製嘅新戲《五個小孩的校長》，戲裏面佢會飾演一名負責一間只有5個學生嘅學校、人工5千蚊唔夠嘅校長，戲中仲有千嬅舊拍檔古天樂，亮點係由真人真事改編。千嬅話接拍呢部咁唔商業嘅電影係因為受到篇新聞報道感動，之前仲專誠同戲中演佢學生嘅小演員試戲，一向忍唔到笑嘅千嬅仲畀呢班小朋友搞到笑到停唔到口，佢仲話似湊仔多過似演戲。佢接受訪問話今次挑戰係做一個作育英才嘅校長，佢話：「今次好大挑戰，除咗同之前嘅戲種唔同，好在我自己都有小朋友，所以知道點同小朋友溝通，同埋有充足時間同班小朋友溝通。」
捐出囝囝床
另外，1,600隻熊貓襲港，早前專登去到渡海小輪碼頭，千嬅都有抽空同佢哋見面，佢講笑話相對《五》片嘅小朋友，呢班熊貓乖好多同聽話。千嬅話今後會加強環保意識，佢話：「近年氣候變化畀我哋一個好大警示，保育可以從基本生活開始，好似囝囝Torres嘅BB床都唔知傳到第三或第四手。而作為歌手藝人，平日出席活動嘅衫褲都會有贊助，又或者用二手衫加入創意細節，呢方面都可以減少製造廢物。」
撰文：馮仁昭
【622公投 我撐普選】毅行直播
流動版網頁:
http://622popvote.appledaily.com