立法會議員黃毓民噚日下晝突然喺法庭門口出現，冇回答八方提問，就急急腳上法庭。原來佢冇交罰款，仲要俾法庭兩度通緝，佢呢鋪都直認烏龍，要同法官道歉。
罰款條數又點嚟呢？話說毓民同「大嚿」陳偉業2011年7.1遊行嗰陣，要求特首曾蔭權撤回替補方案，仲率領群眾喺中環衝擊警方。舊年5月，裁判官裁定佢非法集結等罪罪成，原本判監六星期，但准佢緩刑，同埋罰款4,800蚊。高院一個月前判毓民上訴部份得直，只判罰款4,800元。有內地護法翌日立即炮轟高院，話判刑過輕，不利維護公共秩序云云。毓民話知你，聲言繼續上訴。
但係，毓民唔記得依時畀罰款，法庭通緝佢，毓民去警署畀咗5,000蚊，佢噚日朝早9點半原本要到法庭解釋，但朝早又見唔到佢，法官惟有第二次發出通緝令。
原來，毓民個助理唔記得提醒佢，佢又一時記唔起，直到自己記得打電話去司法機構確認，已經過晒鐘，惟有急急腳到法庭向個官道歉，法官都接納佢嘅解釋，撤銷通緝令，叫毓民去會計部找返尾數。
毓民再同八方傾，話自己今次都矇查查，離開法庭笑住講：「衰嘢！咁烏龍！」
【622公投 我撐普選】 毅行直播
流動版網頁︰ http://622popvote.appledaily.com