前日係父親節，唔知大家點同父親慶祝呢？而做藝人嘅，無論係星級爹哋定係星級子女，就算平日點忙都好，都有抽空歡度呢個父親節。
好似李雲迪咁，前晚佢就喺佢微博度貼咗啲相，佢同咗佢爸爸去食大餐，張相入面嘅李爸爸，好專心咁享用美食；鄭中基都有將佢點樣度過父親節嘅相放上網，佢同囡囡好開心咁玩騎膊馬，兩父女笑容燦爛！而郭羨妮一家就喺屋企開大餐，雖然張相就唔見佢哋位千金，不過郭羨妮同佢老公就影咗張鼻貼鼻自拍照，粉絲睇完都大讚sweet爆！
幸福嘅，除咗一班人父人母，仲有噚日34歲生日嘅祖兒呀！佢班fans好有心，喺微博留言：「縱使路途上崎嶇滿佈，我們也一直會在你身邊保護你，支持你！Happy birthday @容祖兒」，而好姊妹Twins及經理人霍汶希，都有喺微博貼相賀壽星女，不過祖兒男友劉浩龍就暫時喺微博未有表示，繼續低調作風，唔知佢有乜驚喜送畀祖兒呢？
【622公投 我撐普選】毅行直播
流動版網頁︰ http://622popvote.appledaily.com