飛毛腿（1399）剛啱喺上星期突破咗盤整已經整整一季嘅三角形，keep喺阻力樓上，似乎等爆邊，又講「小米股」，飛毛腿又至抵搞，買飛毛腿，博破頂。
飛毛腿主打嘅手機電池，除咗熱爆小米，新增另一祖國大孖沙聯想（992）。據市場研究公司Canalys統計，全球智慧型手機今年頭一季出貨量2.8億部，同比增加29%，當中，全球十大品牌當中，聯想排第四，小米第六。飛毛腿有兩個大哥大客仔，掂過碌蔗。
再講，一向主打祖國市場嘅大哥大小米，前排先宣佈，今年會積極進軍印度、巴西同俄羅斯等嘅新興市場，明年目標向上衝擊一億部。小米手機，以平靚正見稱，外拓市場，有佢優勢，飛毛腿亦長做長有。
事實上，剛啱上個月中，喺飛毛腿AGM，管理層就以「多到應接不暇」來形容家陣接定單嘅情況。而上年，飛毛腿銷售咗6,100萬粒電池，以保守估計，今年可以銷售1億粒。計計數，預期增幅達到61%。再講，隨住祖國4G開波，估計換機潮慢慢浮現，照計，飛毛腿下半年仲好景。
今年純利料可翻一番
承接上年大幅虧轉盈，估飛毛腿今年純利翻一番到7,660萬銀人仔，冇問題，預測PE跌到9倍單位數。又飛毛腿仲喺近八年低位，現價（0.85元）比2007年最高峯期3.80元，大跌咗77%，PB得0.6倍。場內手機或者小米股，通達（698）11倍預測PE，兩倍PB、富智康（2038）19倍PE、1.2倍PB、舜宇光學（2382）14倍PE，另高達3倍PB。
飛毛腿嘅PE同PB，都平咗一大截，吸引到痹，以1倍PB1.36元做目標，飛毛腿講緊要升60%，未有耐追到行家之餘，PE兼先剛啱追到上通達。
錢雋
細價股專家
本欄逢周二、三、五刊出
【622公投 我撐普選】毅行直播
流動版網頁:
http://622popvote.appledaily.com