世界盃開咗波成個星期，我都miss咗唔少賽事，不過西班牙俾荷蘭大炒果場梗係睇咗，唔係都唔知點同班friend搭嘴！至於我做乜咁犧牲連波都唔睇，其實除咗要考試外，仲係為咗啱啱星期日踢嘅U18足總盃決賽，我哋橫濱FC（香港）青年軍今次堅呀！贏晒今年U13、U15、U16同U18嘅足總盃冠軍，做咗大贏家。
嗰日我哋踢壓軸，開波前已經知道另外兩組都係橫濱贏，我啲壓力即時無限量擴大，成個場又坐滿晒觀眾，屋企人同朋友都組團撐我，心諗唔衰得㗎！呢一刻，我終於明白巴西踢主場嘅壓力，你諗吓，話晒都喺自己地頭，仲有全國人等睇你表現，踢得好就好似尼馬咁做全國英雄啫，有咩差池就變卡斯拿斯喎！
我哋一開波就俾人狂攻，都咪話唔驚啊！之後定番，終於踢番出水準，仲連入兩球，諗住今次穩陣啦！點知最後3分鐘俾愉園破蛋，連勢都失埋，見住個波喺龍門前飛嚟飛去，心都爭啲跳埋出嚟。好彩最後頂得住，捧走隻盃。果刻真係超開心、超興奮，全靠我哋上下一條心，用意志一步一步捱到捧盃，嗰種勝利嘅感覺真係冇得輸呀！
文：許家樂
識睇 一定睇蘋果嘅足動世盃：
http://worldcup2014.appledaily.com/