如無意外，今屆世盃我哋都唔會再聽到克羅地亞球員接受傳媒訪問，因為有記者激嬲咗班球員，搞到佢哋「格仔相」外洩，所以一眾「格仔兵」決定同傳媒割席！
事緣係咁嘅，有一日，成班克羅地亞球員好開心咁喺酒店泳池游水，有個別球員仲high到除晒衫褲裸泳。點知就有兩個攝影師鬼鬼祟祟咁偷影佢哋，仲發佈咗啲相出嚟，搞到成班球員都好嬲。本身輸畀巴西輸得咁唔抵，班球員已經好躁㗎啦，啲相一公開，難免班球員咁大反應，即刻話唔再接受所有世盃記者嘅採訪。
裸泳被拍杯葛傳媒
球員唔接受採訪，作出無聲抗議，自己本身都好嬲嘅教練尼高高華就幫佢哋發聲，佢同記者講：「你班人做埋啲咁過份嘅嘢，我唔可以逼佢哋收番呢個決定㗎喎。再加上，你試吓俾人影裸照放上網吖，你會有咩感受？班球員好堅決話唔睬你哋，我唔知佢哋嘅行動幾時完，可能係聽日，可能完咗世盃之後。我尊重佢哋嘅決定，我亦知道你哋一直都好專業，不過今次就真係太過火，全世界都睇到啲相喇！」
喀軍伊度奧勢玩完
拒絕傳媒採訪，啲球員或者可以更專心踢波，可能係好事都唔定。而以下呢件事，對於「格仔兵團」嚟講，就一定係好消息。佢哋周三嘅比賽對手喀麥隆，已經確認咗，隊長兼主力前鋒伊度奧唔會上陣。伊度奧喺Twitter話：「我膝頭受咗傷好痛，醫生亦確認咗我喺對克羅地亞嘅賽事冇可能上陣。」
喀麥隆國家隊發言人話，伊度奧要缺陣10日，連最後一場對巴西嘅分組賽都唔出得，換言之如果喀麥隆冇得晉級，伊度奧今屆世盃已經玩完。喀麥隆本身已經係A組嘅大冷門，𠵱家仲要冇埋伊度奧，應該都凶多吉少㗎喇。
【622公投 我撐普選】 毅行直播
流動版網頁:
http://622popvote.appledaily.com