Lulu一燈成名，世界盃只係開波幾日，已率先成為大贏家，呃like無數。查實世界盃四年一度，要借此良機上位實手快有手慢冇。剛開始招股嘅都市麗人（2298），話就話係「中國最大貼身衣物公司」，不過市佔率只得2.8%，比起Victoria's Secret於美國佔19.1%、Wacoal於日本佔17.8%，好聽講句就係有極大進步空間，難聽講就係品牌根本未成氣候。
不過事實又睇得出品牌的確好努力去做marketing，大灑金錢請林志玲拍噴血廣告（後來再請黃曉明做男性內衣代言），結果廣告令一學生無心向學，搞到林志玲要致歉。
世界盃聽落似係男人嘅節目，但都市麗人度到橋做宣傳，打正「女神世界波Bra」，口號係「用文胸（Bra）來搖旗吶喊」，然後推出一系列唔同國家隊主題內衣，用微電影教你用內衣，由足球世界「搶回」你男友。為咗令女士們投入足球世界，更發佈「世界盃帥哥觀賽指南」。能夠起用咁大膽兼呃like嘅宣傳橋，睇得出公司有搶高市佔野心。睇番招股文件，公司13名董事及高層中，幾乎為男士嘅天下，唯一一名女士之所以入局，相信係因為佢係創辦人嘅老婆。呢個格局令菲菲諗起好多年前劉青雲同古天樂套《絕世好Bra》，或者正因為佢哋係男人，先更識得點去賣Bra。
Fifi
http://www.facebook.com/lovefrystock
本欄逢周二、四刊出
【622公投 我撐普選】毅行直播
流動版網頁:
http://622popvote.appledaily.com