國寶突襲傳媒機構!宣傳保育嘅1,600隻熊貓由上星期開始,去香港唔同景點快閃,但原來有部份「熊出沒地點」一直保密,繼深水埗明哥嘅愛心飯堂後,噚日仲去咗探幾個傳媒機構,第一站就係深入位於將軍澳堆填區嘅《蘋果日報》嘞!壹傳媒大樓2樓中庭花園同樓梯,一下子放滿123隻萌爆熊貓。
唔知熊貓大軍係咪太懶瞓呢,佢哋較原定時間遲咗一個鐘左右、即約午飯時間駕到。話就話係秘密到訪,但果然係隔牆有耳,唔少同事收到風,等候熊貓光臨期間,不時有人走去中庭裝裝吓,連平日唔使咁早開工嘅部門,都有人一早返到公司霸頭位影相。
萬眾期待,載住熊貓嘅貨車終於到埗,一隻隻熊貓由工作人員陪住上到中庭,搵個靚位擺好甫士影相,但一眾同事見到熊貓即刻失控,個個爭住同佢哋selfie,攝影師想影張淨係得熊貓嘅靚相,真係難度10分。拍攝期間,有同事忍唔住高呼:「好彩今日有返工!」
晏晝換水手look搭小輪
逗留大概一個鐘後,一隻隻熊貓輪住同大家講拜拜,當工作人員帶走最尾一隻熊貓時,回頭一睇,原先堆人已經全部消失,原來真正快閃嘅係八方一班同事。熊貓大軍噚日又去咗搭天星小輪欣賞維港兩岸風景,其中一隻熊貓仲戴咗船員頂帽,同拎住個水泡,一副水手look。
李八方
http://[email protected]
【622公投 我撐普選】 毅行直播
流動版網頁︰ http://622popvote.appledaily.com