內房近年越來越難做，恒大地產（3333）索性大搞副業，但旗下嘅足球隊本月初先拉攏阿里巴巴入股止血，礦泉水業務營運未夠一年，兩瓣業務仍屬雛形，恒大總裁夏海鈞噚日竟然喺股東會向小股東大力推銷，話呢啲業務係未來盈利增長點，揚言成熟一個分拆一個上市㖭。
恒大足球隊過去四年狂燒銀紙，經常強調為打品牌，唔係搵錢，夏海鈞認每年預算使2億元（人民幣．下同），好在最近獲阿里注入12億，將前期虧損全部收番，盤數即刻變為淨收入，就打定算盤上市。而且，恒大同阿里唔止一齊玩足球，地產同互聯網都有合作空間。
舊年趁贏到亞洲冠軍聯賽推出嘅恒大冰泉，夏海鈞就話，做水嘅毛利率好高，每支成本只係8毫，賣到3、4蚊，但首兩年好難賺到錢，今年利潤都全部撥去賣廣告，佢估計，恒大冰泉起碼要三年先有錢賺。
【622公投 我撐普選】毅行直播
流動版網頁:
http://622popvote.appledaily.com