林鄭月娥主持西九建設大計，因受高鐵工程阻延，成本急升等因素影響，西九文化區不知幾時先至可以落成。此西九計劃，由曾蔭權政務司長開始，跟住由許仕仁司長、唐英年司長，以至到林鄭月娥司長，一共四位政壇紅人負責過，至今一事無成，似係異數。早知道咁，十四年前就將西九土地作商業用途，起多三四棟ICC加一個大型會議展覽中心，沿海整個海濱公園，西九今天已可成為另外一個中環，與新加坡Marina Bay有得比，香港甲級寫字樓租金唔駛咁高昂，咁樣在世界競爭力排名上，點會輸俾新加坡呀。六月十一日南華早報刊出一張新加坡沿海新商業中心圖片，美觀甲級商廈之多，令人讚嘆，呢啲新廈係過往十幾年湧現嘅，長此以往，香港出盡食奶力都追唔上。
西九文化區難產，林鄭還要講風涼話，指香港文化界未必追得上，建設慢啲都無大影響。究其實，香港表演藝術（話劇、戲曲、舞蹈、音樂）之長期難以有飛躍進步，皆因表演場地不足，藝術團即使有好節目上演，做一陣就要斷癮，每每大量增加成本，難以賺錢，投資者唔蝕本就拜得神落，咁嘅環境，香港文化點樣有前景呀？林鄭做好本份，交到貨先至單打別人啦。
七月十七日起就有一大型原創舞台劇在演藝學院上演，一經宣佈啫，所有入場券都賣晒，26場滿座，製作公司「英皇娛樂」因為場地不能連續租落去，被迫斬件，七月十七日至二十六日演完十場後，要到九月重新搭景，在九月四日至二十日做十六場，排期零舍辛苦過人，與紐約百老匯啲戲劇可以一搥鑼鼓直落演出一年半載嘅情況完全不同。
英皇呢套大製作「杜老誌」未出先轟動，皆因台前幕後都係黃金陣容，男女主角係梁家輝、謝君豪、劉嘉玲，藝術總監/導演係毛俊輝，監製梁李少霞，美術及服裝指導張叔平，原創劇本由金牌編劇莊梅岩執筆。莊梅岩呢位中大逸夫書院師妹認真搶手，爆紅得緊要，去年憑「教授」一劇（即慶祝中大校慶五十年之戲劇，由香港話劇團演出），獲香港話劇界最佳編劇獎，毛俊輝話佢潛質無限，對香港話劇會好有貢獻喎！
【622公投 我撐普選】 毅行直播
流動版網頁︰ http://622popvote.appledaily.com