上星期五晚，大家3點鐘睇荷蘭復仇記，全世界10幾億人呆晒，大莊當然執到笑，連走地盤都殺埋。如果有個儍佬晨早買中五比一，十皮已經變6,000，如果有，請上載波飛到facebook等大家欣賞下。
雖然我買中荷蘭，但亦都戥西牛可惜，於是第二朝起身手痕改詞，容祖兒嘅《十六號愛人》，如下：「煲西班牙，經已沒意思，贏荷蘭一次，荷蘭佬轉打法你會喫屎，原來就算戰鬥格不過暫時，名次再隔兩日即改變位置，一變四，四變十二，來到這禮拜更加諷刺，何以，你貢獻五粒係咪換錯人，隨便，碰上那個他都俾你嘅腳法吸引。偶爾我亦，願我是敵人，能轉個靚盤落注買敵陣，你以前是冠軍，怎會慣後衞亂放人，曾經，也上到最高逐漸滑落谷底的暗，費托入場，雙腳已在震，西甲國腳繼續排陣，噚晚受教訓。」
「西班牙911」之前六個小時，立法會討論東北發展，大批市民場外集會，之後又有衝突，呢單嘢牽涉到嘅款項一定大過西班牙荷蘭全球總投注額，香港人仲要埋單。班後生仔為咗乜嘢要抗爭，相信大家睇波之餘，都請花時間理解下。巴西政府用晒啲錢去搞世界盃，民生撥款大受影響，結果開波之後都繼續有幾個城市暴亂，你今日消費緊嘅世界盃，原來係地球另一邊人嘅痛苦，不可不知。
文：梁柏堅
【622公投 我撐普選】 毅行直播
流動版網頁:
http://622popvote.appledaily.com