證監會近日登報公開招聘投資產品部執行董事，呢個位現時由今年初續約一年嘅張灼華（Alexa）做緊，照理就係物色人選接替Alexa，不過Alexa嘅職銜唔止係咁，其實水蛇春咁長，後面仲有國際及中國事務執行董事暨副行政總裁，唔知呢兩個位又點處理呢？
Alexa喺證監會做咗好耐，1998年就加盟，原本今年2月底退休，不過有消息指政府希望佢搞埋中港基金互認安排先退下來，於是同佢續約一年，合約期至明年2月底，證監會𠵱家開始物色Alexa嘅替任人，都好合理啫。
近年中港市場越嚟越多產品方面嘅合作，好似RQFII，年底又有滬港通，證監會聘請呢個職位，除咗要有經驗、熟悉證券同期貨市場呢類基本嘢，都特別要求應徵者能夠與內地機構同埋監管機構合作，又要對方精通中文並操流利普通話㗎。
識睇 一定睇蘋果嘅足動世盃：
http://worldcup2014.appledaily.com/