同圈外朋友講起球星，原來你可以唔認識尼馬、可以唔記得邊個係美斯定張家輝；但身邊嘅女性冇一位唔識基斯坦奴朗拿度（C朗、圖）。今晚12點將有萬眾期待嘅C朗出場，率領葡萄牙眾將硬撼勁旅德國，大家可以睇到C朗英姿。
入波助攻一樣掂
仲記得18歲踢曼聯嘅C朗係幾咁「𡃁仔波」，𠵱家就不得不寫個「服」字畀佢。被譽為地上最強係有原因嘅，C朗上年喺皇馬加國家隊入咗66球，個人技術出眾外，助攻搭路亦漸見成熟穩定，奪得金球獎係實至名歸。加上外表有型又靚仔，身形健碩，長期成為傳媒、電視台及雜誌嘅目標，上次拎獎仲要抱埋個仔出嚟多謝女友，形象更為健康正面，真係好難唔風靡全球。
「插花」有一手
C朗最出名就係「插花」技術驚為天人，「插花」係指球員盤球時左右腳內外跨過皮球，以騙過對手嘅攔截。今晚大家一齊為C朗吶喊助威時，記住留意佢有波在腳時嘅「插花」喇！
陳婉婷
太陽飛馬助教
識睇 一定睇蘋果嘅足動世盃：
http://worldcup2014.appledaily.com/