【本報訊】無綫奪得今屆世界盃獨家播放權，連同製作費，成本高達4億元，不少食肆老闆透露，無綫投資額高，因此收取轉播費開價「食水深」，香港酒吧業協會副主席錢雋永指，單一間的酒吧向無綫洽購世盃播放權，對方索價5萬元，有連鎖式酒吧在議價後降至3萬元。
即使有酒吧願意揼本買足64場播放權，卻要面對「有波睇，冇酒賣」的劣勢，現時酒牌局有限制酒吧賣酒時間，最早於凌晨2時後就不能賣酒，最遲則是清晨5時，「即係就算酒吧播得，冇得賣酒都做唔成生意。」錢指，有酒吧衡量後，認為「有得播，冇得賺」，寧願損失「睇波客」也不願安裝收費電視。
「唔通播劇集咩」
位於長沙灣家庭式經營的匯發茶餐廳一向做熟客生意，店內設有三部電視機，老闆杜先生表示一向有幫襯now及有線轉播足球賽事，兩台每月月費近1萬元，他指就世盃轉播權，無綫索價簽約半年收費28,000元，另加安裝費10,000元。他考慮後，決定不會購買世盃播放權，「老實講，無綫播完世界盃後仲有乜睇？唔通播劇集咩！有嘢睇就抵，問題係之後冇嘢睇」。
杜老闆亦指，「啲客話我蝕梗！其實我哋有九成半係街坊熟客，相信淨係播22場免費賽事，對生意都冇乜影響」。
識睇 一定睇蘋果嘅足動世盃：
http://worldcup2014.appledaily.com/