荷蘭喺首場分組賽對西班牙復仇成功，以5:1大炒對方，真係乜仇都報晒。其中上屆決賽單刀失機嘅洛賓，該仗兩次技術性擊倒卡斯拿斯，都可以話係一吐烏氣。報仇成功，隊內嘅氣氛就梗係好啦。上周六佢哋繼續喺基督像下面練波，唔知係唔係提早慶祝父親節，教練雲高爾批准一眾球員喺操練中，帶埋佢哋嘅囝囝囡囡落場，畀班球星享受吓親子時間之餘，仲可以晒吓父愛。
尹佩斯情深一吻
當中最多人留意就一定係喺比賽中化身成「超人」頂入，成為贏波功臣之一嘅尹佩斯啦。先唔探討佢人品如何，但佢喺囡囡甸娜面前就一定係個慈父，除咗同囡囡喺球場跑步外，仲嚟個深情一吻。另外兩個贏波功臣，史奈達同洛賓都不甘示弱，亦同小朋友玩得好開心。
尹佩斯之前警告過曼聯隊友，話雲高爾好嚴格，要有心理準備。雖然雲高爾嚴格，但球員喺佢麾下都應該會踢得幾開心，皆因喺對西班牙嘅大戰前，呢位荷蘭名帥就打破傳統，特登畀時間班球員同佢哋另一半見面。唔知係唔係因為有「愛的鼓勵」，呢班橙衣兵就大發神威，大勝一場。而球隊贏波後，亦可以放鬆一下，同班仔女過吓家庭樂。一班曼聯球員應該唔使驚呢位教頭啦。
雲帥恩威並施贏讚賞
雲高爾曾經同唔少球星鬧不和，睇嚟吸取過經驗後，已經學精咗。今屆賽事，班荷蘭兵同雲高爾嘅關係都唔錯，而尹佩斯就更加同佢friend過打band。同球員關係咁好，加上改變戰術成功，雲高爾英明嘅領導其實比起尹佩斯同洛賓仲值得令人讚賞。唔知喺今年人腳較差嘅情況下，雲高爾有冇機會帶荷蘭攞到第一個世盃冠軍呢？
識睇 一定睇蘋果嘅足動世盃：
http://worldcup2014.appledaily.com/