不經不覺劉家良師傅因血癌離開已經一年，噚日係父親節，亦係劉師傅逝世一周年（以農曆計），劉師傅愛妻翁靜晶、大女劉萬儀及冼國林等弟子，到大埔凌雲寺為劉師傅進行拜地藏懺儀式，至於劉師傅細女劉幸儀就因為病咗冇現身。
女兒憶憾事
講到父親節，翁靜晶話兩個女特別傷感：「兩個女嘅心情唔太平復，上年父親節劉師傅病得好嚴重，兩個女唔信係最後一個父親節，冇陪佢一齊過，之後好後悔。」
翁靜晶一路為「劉家良武術電影慈善基金」四出張羅，最近終於得到政府資助，翁靜晶話：「政府批咗，基金會幫助受傷嘅龍虎武師過渡，亦會助學，開辦武術班幫助雙失、邊青，我哋仲想開武術學校教洪拳，教學目標主要係以14歲以上嘅小朋友。」冼國林亦希望藉住教授洪拳，可以將走歪嘅年輕人拉回正軌。
撰文：馮仁昭
【622公投 我撐普選】 毅行直播
流動版網頁︰ http://622popvote.appledaily.com