上周五立法會因為財務委員會主席吳亮星「霸王硬上弓」，搞到外面反對東北發展嘅示威者試圖衝入立法會。正當全城緊張之際，負責政府危機處理、月薪18萬嘅新聞統籌專員（IC）馮煒光，喺fb貼咗一張「三個壽包」照片出嚟，睇嚟佢應該喺關鍵時刻去咗嘆茶。
有見及此，八方噚日去咗「香港政改關注組」嘅記者會時，走去問喺煲呔年代做過IC嘅何安達（Andy），了解吓IC呢份工係咪好清閒，可以拗吓腳趾、食個壽包就過日辰。Andy話梗係唔係啦，回想起煲呔任期完結時，一日有成200幾條傳媒問題湧埋嚟等佢回應，問煲呔出trip住邊間酒店、開支幾多等，「咁你話易唔易做呢？」咁辛苦，要多得煲呔咁識嘆囉。
同場仲有中原兼《am730》創辦人施永青，由於有指《蘋果》被抽廣告，幕後黑手係中聯辦副主任楊健，施老闆相信，同樣被抽廣告嘅《am730》，背後黑手應該再高級啲，起碼係國務院嘅級數落柯打，中聯辦只係執行者。施老闆話，即使有其他廣告補番數，但唔多唔少都會拖累公司收入同分花紅，不過影響並不致命嘅。
識睇 一定睇蘋果嘅足動世盃：
http://worldcup2014.appledaily.com/