上個星期一口氣睇咗咁多場世界盃後，印象最深嘅一定係荷蘭對西班牙啦！呢場上屆決賽翻版嘅大戰，賽前都諗住兩隊實力咁上下，預咗要鬥到最後1分鐘，點知西班牙越踢越冇，唔單止俾人哋入波，最後更出現咗個估100次都唔會估中嘅賽果，荷蘭竟然踢到識飛咁，數班狂牛5:1！
唉！呢場波就梗係一地眼鏡啦！好多球迷亦攞咗卡斯拿斯嚟祭旗，講真我一向都覺得佢好穩陣，仲係皇馬同國家隊嘅精神支柱，可惜今場做咗球迷眼中嘅大罪人，犯咗幾個低級錯誤，搞到隊波倒輸。不過我就覺得唔使踩到佢咁盡嘅，就算佢踢得差都有值得原諒嘅地方，諗吓佢今季喺皇馬踼得幾多場正選？冇態都好正常啫，返到國家隊就要佢孭飛，畀你都有心無力啦！
加上個後備席仲有個世界級嘅迪基亞，你估真係唔驚㗎！呢啲壓力隨時攞你命啦！自己都係踢波，都好明白呢種感受。講到底，卡斯拿斯嘅技術有冇跌watt，都唔係一場波就可以決定到嘅，希望各位球迷都畀啲包容佢啦！和諧！和諧！文/圖：陳子樑
【622公投 我撐普選】 毅行直播
流動版網頁:
http://622popvote.appledaily.com