呢排最hot話題非國務院頒佈嘅白皮書莫屬，但呢本講阿爺「一錘定音」管治香港嘅白皮書，竟然同六四真相呢個中共禁忌扯上關係？
曾公開講過1989年六四並無血洗天安門嘅全國政協張家敏，噚日出席城市論壇討論白皮書期間，竟然主動挑起六四話題嚟講，指如果白皮書有心針對佔中或6.22投票，咁白皮書應該喺十幾廿萬人出席六四燭光集會嗰時推出喎，更向出席嘅嘉賓佔中發起人戴耀廷挑機，指有人話六四同佔中係一脈相承，係顛覆基地，問戴耀廷有乜回應？
劉銳紹忍唔住反擊
張家敏講得興起，繼續指有啲人斷章取義，煽動群眾，搞到香港社會被分化，互相仇恨，佢話香港人對「六四真相」所知甚少，認為香港人應該全面知道「六四真相」，理性討論喎。城市論壇主持謝志峰打蛇隨棍上，叫張家敏講多啲「六四真相」畀大家知，另一嘉賓基本法委員會委員譚惠珠即刻擋駕，指討論題目係白皮書，唔應該轉去六四。
但謝志峰再三要求下，張家敏即刻現形「披露」六四真相，八方立刻豎起耳仔聽，張家敏就話當年除北京外，全國有30多個城市都有暴亂，如果唔採取行動，就會步蘇聯解體下場喎，又話當年學運領袖事後出書，亦有講過係和平撤離天安門。另一嘉賓劉銳紹即刻反擊，話張家敏只係將其中一個現象掩蓋六四全部，係單一角度，並非多元角度。
不過，八方發現張所講嘅六四真相原來係舊料，佢以前都講過晒㗎喇，真係令八方空歡喜一場㖭！
李八方
mailto:[email protected]
【622公投 我撐普選】 毅行直播
流動版網頁:
http://622popvote.appledaily.com