雖然有唔少細路仔動畫係關於昆蟲嘅，好似《蟻哥正傳》同《蟲蟲特工隊》等，裏面啲昆蟲鬼咁可愛。不過，如果係面對呢啲昆蟲嘅真身，莫講話係細路仔同女士，就算係我求大俠嘅堂堂大男人，都會覺得好核突，毛管都戙埋；難得係烏拉圭國家隊門將梅斯利拿發現一大隊螞蟻入侵烏國嘅世盃訓練營，甚至爬晒上佢張床度，佢都話冇問題，仲好好瞓㖭！
大床佈滿螞蟻
話說梅斯利拿喺日前於個人社交網頁twitter度，上載咗一張有數以百計螞蟻喺佢酒店張床度爬嚟爬去嘅相，因此令人議論紛紛。不過，梅斯利拿就似乎冇有怕，佢喺烏拉圭上周六對哥斯達黎加嘅賽前記者會度話：「我覺得係搞笑多於一切囉！我同後備門將洛迪高蒙路斯係同一間房嘅，我哋返酒店房，發現床上面好多蟻，於是就通知酒店方面，佢哋就立即派人嚟同我哋換過晒啲床單被鋪。」
雖然從相片所見，嗰啲並非毒螞蟻或者係紅火蟻呢啲害蟲，只係普通蟻，但梅斯利拿對酒店嘅衞生要求咁低，淨係換咗床單就可以了事，我求大俠都好琜頭，梅斯利拿仲話：「我覺得冇問題喎！之後嗰晚都不知幾好瞓㖭！」
烏國球迷為哥軍「打氣」
梅斯利拿就話瞓得好，但哥斯達黎加嘅球員就可能冇覺好瞓。皆因喺上周六烏拉圭對哥斯達黎加賽前，烏國球迷為咗「幫助」自己嘅球隊，竟然去到哥斯達黎加國家隊嘅基地外面，不斷敲鑼打鼓，製造噪音，希望能夠影響到哥國球員嘅休息。哥斯達黎加嘅球迷收到風之後亦唔執輸，就好快趕到過嚟，不過，佢哋並冇同烏國嘅球迷開片，反而利用烏拉圭球迷嘅鼓聲，作為佢哋歌聲嘅伴奏，搞到烏拉圭球迷好冇癮，最終「散band」。不過，我求大俠就覺得，佢哋嘅歌聲都未必動聽，咪一樣係嘈住哥國嘅球員！
識睇 一定睇蘋果嘅足動世盃：
http://worldcup2014.appledaily.com/