世界盃開波啦，眾星邊睇波邊來一場牙骹戰！曾五奪冠軍的巴西今年有主場之利，難怪丁子高、林敏驄、許冠文都熱捧巴西封王。雖然陳奕迅和周秀娜因為情意結，對港人至愛的英格蘭情有獨鍾，但都覺得愛隊只能躋身8強，睇好巴西成為王者之王！許志安和方力申則力撐阿根廷，因為有球王美斯嘛。
撰文：余燕儀
張智霖
我撐邊隊：南韓
今屆估計：入8強
心水冠軍：巴西
我捧南韓，因為鍾意《來自星星的你》，南韓各方面近年都好犀利，好似演藝界，球員都踢得幾好，最有印象南韓球員好夠氣（圖），好似有跑唔完嘅氣力，唔知係咪食得人蔘多。
方力申
我撐邊隊：英格蘭
今屆估計：入4強
心水冠軍：阿根廷
最難忘碧咸踢低施蒙尼攞紅牌（圖），今屆心水冠軍就係阿根廷，因為有美斯，上天係會畀一個人贏晒所有嘢，因為要創造傳奇，所以美斯會贏晒，因為佢係全世界最勁。
許志安
我撐邊隊：阿根廷
今屆估計：攞冠軍
心水冠軍：阿根廷
我捧阿根廷，因為球隊有美斯，而且今屆世界盃喺南美洲搞。最難忘78年世界盃決賽攞冠軍（圖），紙碎飄落嚟嘅場面，真係好似演唱會一樣。
周秀娜
我撐邊隊：英格蘭
今屆估計：入8強
心水冠軍：巴西
我捧英格蘭，因為香港人嘅情意結。最難忘02年對阿根廷，靠碧咸唯一個12碼贏咗嗰幕（圖），始終98年碧咸因為年少氣盛犯下大錯，紅牌出場令球隊輸波，4年後再碰上好大壓力，但佢handle到，報一戰之仇係好深刻。
陳奕迅
我撐邊隊：英格蘭
今屆估計：入8強
心水冠軍：巴西
自己喺英國讀書梗係捧英格蘭，因為球員參加英超賽事多，有疲態，不過默契好強。球星最鍾意碧咸，最難忘佢上帝之腳，少少脾氣踢人一下收紅牌出場，令英格蘭打少個成為罪人，之後碧咸收過恐嚇信，仲俾人吊起球衣話要燒佢。公眾人物要承受呢啲，自己都感同身受。
張家輝
我撐邊隊：德國
今屆估計：攞冠軍
心水冠軍：德國
心水梗係德國隊，支持佢哋年輕又有活力，印象最深就係佢哋之前嘅金色轟炸機奇連士文，佢哋贏世界盃嗰年（90年、圖）對住荷蘭場半準決賽真係經典。
丁子高
我撐邊隊：比利時
今屆估計：入4強
心水冠軍：巴西
愛隊係比利時，覺得會入到四強，心水有兩個球員，夏薩特同羅馬路盧卡古，最難忘2010年八爪魚保羅成日tip中邊隊贏，好搞笑，嗰年西班牙對荷蘭本來打和，恩尼斯達喺加時入波贏咗都好難忘。
許冠文
我撐邊隊：巴西
今屆估計：攞冠軍
心水冠軍：巴西
愛隊當然係主辦國巴西，應該會係今屆冠軍，因為巴西係用「情」去踢波，有森巴嘅激情同千變萬化嘅最高足球技術。從球王比利（圖）到今日嘅尼馬，喺球場上就好似魔術師表演一樣。
Eric So
我撐邊隊：巴西
今屆估計：攞冠軍
心水冠軍：巴西
情意結係巴西，由細到大知巴西係足球王國，今年仲係主場走唔甩。最深刻98年大家以為巴西攞冠軍，點知朗拿度突然發瘟（圖），結果輸畀法國。
林敏驄
我撐邊隊：巴西
今屆估計：攞冠軍
心水冠軍：巴西
梗係支持巴西，希望攞到冠軍，但每屆大熱門都未必贏，驚輸死嗰啲賭波，最難忘3R朗拿度、朗拿甸奴、李華度三個好犀利，鍾意巴西隊因為佢哋天生識踢波，同埋係快樂足球好開心，仲有同我一樣咁好波。
松岡李那
我撐邊隊：日本
今屆估計：攞冠軍
心水冠軍：日本
自己是日本人當然支持日本隊，最難忘的世界盃片段，就是06年總決賽施丹突然用頭攻擊意大利後衛馬達拉斯（圖）。
孫耀威
我撐邊隊：荷蘭
今屆估計：攞冠軍
心水冠軍：荷蘭
由以前荷蘭三劍俠開始，好鍾意呢隊球隊，佢哋踢法好細膩，同埋荷蘭橙色球衣亦係我最鍾意，所以希望今年荷蘭可以打入決賽。最難忘當年荷蘭三劍俠古列治、雲巴士頓、列卡特（圖），佢哋嗰個年代係最好睇，仲有古列治髮型帶領好多潮流。
識睇 一定睇蘋果嘅足動世盃：
http://worldcup2014.appledaily.com/