等咗咁耐，終於等到聽晚我最撐嘅葡萄牙出埸。對住班高頭大馬嘅德國仔，體力、實力都應該係輸蝕啲，C朗之前又話有傷喎，呢場無咗佢就真係危嘞，但我好肯定偶像佢一定會堅持落場，用佢宇宙最強嘅意志帶隊波攞番個頭彩，加油呀C朗！
諗起場波當然超興奮，但同時又有啲矛盾喎！哈哈！因為我漫長嘅考試已經殺埋身，其實真係好慘，世界盃睇波都冇得去到盡。就好似揭幕戰巴西贏克羅地亞嗰場我就錯過咗嘞，鬼叫第日又有non-stop嘅test咩，雖然冇睇直播，不過嗰朝一彈起身，牙都未刷就忍唔住開電視追番賽果，睇見巴西贏波當堂yeah咗出黎，我偶像之一嘅尼馬入咗兩粒喎！下場睇硬直播啦！
除咗考試，其實仲有件重要嘅事，我哋橫濱FC（香港）今日兩點半會喺蒲崗村同愉園爭U18足總盃冠軍。諗番第一場對聯賽冠軍嘅流浪，搏到嘔下先險勝，跟住兩場我哋都踢到12碼至贏，入到決賽除咗運仔外，仲係隊波用血汗換番黎，我哋真係好團結，就算幾忙都堅持練波、聚一聚，希望今日以冠軍嚟完結呢個賽事。記住嚟支持吓我同子樑，免費入場㗎！文：許家樂
識睇 一定睇蘋果嘅足動世盃：
http://worldcup2014.appledaily.com/