德叔：艇仔張，Good morning，今日又食早餐A呀？
艇仔張：德叔，你食錯藥呀，晨早流流講晒英文又咁好禮貌。
福嬸：佢唔係食錯藥，係贏大錢啫，揭幕戰買咗巴西上盤，執咗千幾蚊喎。
肥頭：德叔，你又真係符碌到爆，唔係嗰個日本球證亂吹，奧斯卡杜斯山度士補時階段整多粒，莫講話上盤，巴西主W都開唔出呀。
德叔：唓，我一向奉行賭波不睇波，朝早起身Check一Check戶口結餘，見多咗錢就知贏咗，理鬼得個過程咩。
艇仔張：其實呢啲大賽，一向都係下盤當道，巴西讓到克羅地亞球半/兩球，上盤客幾辛苦先執到半個，都唔夠買驚風散。西班牙對荷蘭呢場大戰，西班牙讓半/一，輸到1:5，當堂開個下盤。
肥頭：今晚又有大戰，阿根廷對波斯尼亞，阿根廷讓到一球/球半，德叔，你又買上盤㗎啦！
德叔：梗係啦，阿根廷有美斯，佢又高大靚仔又好波，有佢撐住，仲有阿古路、迪馬利亞、希古恩，阿根廷Win硬。
艇仔張：連美斯高大都講得出，就知你唔識波……
肥頭：算啦，有運起上嚟，亂買都會中。
德叔：咩呀，早幾日我睇雜誌，有個靚女都讚美斯又高大又靚仔喎。
艇仔張：唓，夠有個天王讚美斯係技術型後衞㖭，唔通你又信呀。
識睇 一定睇蘋果嘅足動世盃：
http://worldcup2014.appledaily.com/