今日原來係父親節，非經老友提醒，左丁山已經忘記咗，一心諗住去馬場搏殺嘅啫，邊會想起父親節呢回事。香港人特別重視母親節，當日連馬會都要讓路，跑馬提早一日星期六舉行，以免撞介影響眾多母親。但父親節就冇呢支歌唱咯噃，一於馬照跑，大概馬會認為所有香港父親都喜歡在馬場歡度父親節啩。
老友點解特別提醒左丁山今日係父親節呢？原來佢話今日九巴有一個尊重父親司機車長嘅環節，以示多謝幾千個今日上班嘅，好多身為父親嘅巴士司機，今日為了服務市民，在父親節仍然緊守崗位，返工揸巴士，希望九巴乘客上車落車之時，向車長講句「父親節快樂！」不過在巴士行駛時遵守交通規則，不可與司機交談！
哦，今日除咗九巴司機之外，仲有好多父親上班嘅，特別係在公共交通方面，左丁山不如索性在此向所有今日在各行各業上班嘅父親致意，香港因你地嘅勤勞，而得以真正繁榮。
今日三T有多寶獎六千餘萬，如十元一注獨中嘅話，計埋今日嘅三T彩池，派彩隨時過八千幾萬，咪話唔和味，根據過往經驗，如此場合多數有不少馬迷夾錢煲佢，本來買開每場四隻互串嘅（共六十四注），今日講唔定會買夠每場五隻馬，共一千注，務求增加中彩機會。唔係幾個人夾份嘅話，唔好買咁大呀！
父親節又係世界盃大賽日，世界盃已在香港時間六月十三日早上三時開鑼，巴西對克羅地亞，昨日凌晨三時有西班牙對荷蘭，今早六時有英格蘭對意大利，都係好戲碼，本文見報時大家已知道戰果，左丁山無謂猜測，不過有好幾位英格蘭擁躉問過，英格蘭今屆在死亡之組（D組），可唔可以出線，力壓意大利與烏拉圭？老實講，英格蘭點睇都唔似有冠軍相，頂多打入八強，在八強賽唔係遇上B組西班牙/荷蘭就係碰上A組巴西，好難想像英格蘭可以過關。出線咯喎，英格蘭今年特別多年青球員，假如領隊鶴臣放手一搏，靠啲新仔憑速度與新鮮感，有機會撼低意大利與烏拉圭，但如果用番班舊人，了無新意嘅話，會係失望收場！
【622公投 我撐普選】 毅行直播
流動版網頁︰ http://622popvote.appledaily.com