【灣仔船街】49歲的王敏德除是keep得好的美魔男，更是一名開通的爸爸，他諒解大女兒王曼喜，接受及尊重她與同性女友戀情出櫃，更歡迎對方今日一起歡度溫馨父親節，王敏德說：「見多啲了解多啲！」他自言新世代爹哋要思想開明，不過他擔心仔女感情生活，皆因他會代入男仔思想，識追女仔時，亦識呃女仔，認真幽默兼坦白。
王敏德（Michael）與馬詩慧（Janet）育有兩女一子，大女曼喜、二女麗嘉及細仔躍穎，今日父親節對Michael更添溫馨感性，作為一家之主的他，接受了21歲的大女曼喜勇敢出櫃，公告與外籍女友Lia的戀情，完美示範尊重女兒選擇，更邀請女兒另一半齊度父親節，他前晚在黃竹坑的活動公開表示：「我唔介意，係怕佢另一半悶，父親節唔想阻佢哋，不過冇所謂，見多啲了解多啲。如果佢想邀請朋友都可以，好開心。」
談吐風趣的Michael令到三名子女視他如好友般，相處融洽，前日他與馬詩慧一家五口，接受本報記者專訪，他更與三名子女落場踢波、鬥嘴、互相取笑，絕冇擺嚴父架子，他說：「我哋係好family，有時間就喺埋一齊，所以唔需要乜嘢節日，已經好開心，我哋已經好幸運。」
曼喜前晚拍拖煲煙
其實Michael開明、開通思想遠比他的型爸外表更吸引，有着凝聚家人團結的催化劑作用。王家今年令人關注的事件，莫過於21歲大女曼喜近月與外籍女友Lia的同性戀情，出櫃後獲父母開綠燈支持，二人感情更見公開。前晚8時多，二人於灣仔船街相約友人食飯，等待期間到了附近便利店買煙，之後齊齊在後巷談情煲煙，不時大笑相擁，把握二人世界的時間，曼喜更細心為Lia整理衣領，盡顯細心甜蜜。
Michael接受女兒的同性女友及煲煙，十分開通，他笑言：「三個仔女都長大，會有唔同思想，呢個世代點可以唔開明，作為爹哋，唔覺得呢樣嘢係big deal，會open for it，講到煲煙呢樣嘢，媽咪知道比較緊張，大家知道唔鍾意，有勸佢戒，自己拍戲都會食煙，喺片場十個人有十個食，盡量叫佢唔好食，佢pick up咗唔易戒，去夜蒲十個人都有八個會食，係一種癮，要時間戒。」在旁的Janet亦認為Michael對曼喜的支持及想法令一家人更團結，Janet說：「𠵱家知道咗唔需要再遮遮掩掩，大家有乜都攞出嚟講係好事，我好討厭人講大話。」
Michael自言並不是任何事都處開明態度的爹哋，他表示：「某程度係open，但係鬼佬都會保守，有時候個女條裙短啲、低胸啲都會講，呢啲係男人本色，好似細佬見到家姐條裙低胸，都會幫手拉番高，反而呢樣嘢媽咪會唔介意，話唔太過份就OK。」Michael十分接受曼喜的戀情，更直言見過Lia三次，不過都會擔心女兒的感情事：「唯一緊張係仔女另一半，好似細女之前有個男朋友，我都會問住，男人知點樣追女仔，同呃女仔，所以呢樣嘢會緊張，緊張佢哋感情生活，怕佢俾人呃。」
「最想收底褲同襪」
提到今日父親節的節目，Michael說：「希望收到仔女送畀我一份有創意嘅驚喜，我哋計劃去打高爾夫球，之後去食泰國菜。佢哋非常乖，我哋成日都有趣事發生，雖然成日都會頂嘴，但呢啲都係情趣，佢哋靜落嚟會仲唔慣。」Michael幽默地表明今年想收的禮物：「我最想收到底褲同襪，對我嚟講最有用，不過要有牌子，佢哋知道。」
採訪：羅慧敏
攝影：仇志德、徐錦池、羅德光、李志明
鳴謝：adidas
【622公投 我撐普選】毅行直播
流動版網頁： http://622popvote.appledaily.com