無綫失落了世界盃獨家播映權16年，昨日凌晨重奪「話語權」，用四小時直播節目伴隨揭幕戰娛賓。
正當廣大市民歡天喜地擁抱免費世界盃懷抱之際，未知是否無綫「餓波」太久，為填塞四小時直播空間，無緣無故加插唱歌、煮食環節，嚴重消磨觀眾睇波意欲，結果惹來網民狂插。敢問無綫，點解世盃要咁播？
【6個為甚麼】
1.點解咁多植入廣告？
無綫苦等16年，終於返回世界盃獨家播映主場，這些年頭除了直播技術進步外，亦學懂利用「場邊闊度」，用盡每個角落及有利位置來安插贊助商品，例如推出一排按摩椅供藝人坐。而最明顯必定是可口可樂及百威啤酒，每當嘉賓分享心水球隊時，枱前總「陳列」着大堆飲品。
2.點解會唱歌、煮嘢食？
賽事於昨晚凌晨四時開波，為留住一班捱眼瞓觀眾，無綫已絞盡腦汁，始終炮製四小時直播節目不是易事。無綫刻意營造「森巴」感覺亦無可厚非，但忽然有大廚教煮鮑魚龍蝦，又有頻穿崩的魔術表演，跟睇波完全大纜扯唔埋。無綫又召集藝員撐場，唱出「樣辦」世界盃歌來堆塞時間，結果令觀眾越睇越眼瞓。
3.點解要跟有線球賽台？
無綫於收費台19台播出《低俗講波團》，請來黃毓民和盧覓雪講波，賣點原來是有得聽粗口和九唔搭八評述，以及一眾性感女在鏡頭前晃動。先別說要花費一百幾十元才有得睇，節目的構思跟N年前已有的有線球賽台節目大同小異。
4.點解又係阿叻？
最令網民百思不得其解的，相信是為何每屆世界盃，阿叻陳百祥「老是常出現」，明明昨晚沒有荷蘭的份兒吧！他與李克勤、譚詠麟以「超級球迷」身份擔任節目嘉賓，連主持工作也省掉，純粹在鏡頭前吹水搞氣氛。不過阿叻在蹧躓藝員確實有一手，為沉悶節目添了些少亮點。
5.點解講波咁唔專業？
畢竟是揭幕戰，未知無綫是否為隆重其事，竟一口氣安排黃興桂、李偉文、江忠德、Keyman、鍾志光和潘文迪來評述一場球賽，更巴西、香港輪流評述，接力講波簡直史無前例。不過最令網民不滿的，反倒是評述員嚴重偏頗巴西，又對克羅地亞球員極其陌生。
6.點解關鍵球賽冇得睇？
說到底，觀眾最關心還是有幾多場免費波睇。只可惜免費波跟白皮書所解讀的「高度自治權」一樣，是無綫給幾多才有幾多，今屆世界盃64場賽事，無綫只恩賜22場，當中最關鍵的賽事，包括分組賽的第3場、16強及部份8強賽事等，都只限收費台播放，擺明畀甜頭引人落叠科水裝收費台。
全城熱鬧：網民狂踩賽前騷
事隔十六年，無綫再次奪得世界盃獨家播映權，網民對無綫在賽前安排的撐場節目，以至現場旁述和收費台的《低俗講波團》也大踩特踩，由全城盛事變全城怒潮。
我真名叫高登：廣告時段做訪問問佢哋睇好邊隊仲儍的嗎？成班儍的女，唔識足球又要扮識，喺度扮晒嘢話支持最靚仔嘅C朗同埋葡萄牙！
星夢學園：一人一信畀番有線搞好過，至多我哋夾錢賠畀TVB。
滾水淥正氣：tvb搞體育得啖笑，全部人唔做功課，乜嘢節目都可以拉自己班歌手上去。大佬𠵱家睇波呀，唔係想睇巨聲幫星夢幫呀，你估我哋班球迷係港女想睇歌星咩。
mirandalaw：低俗講波團，淨係一個黃X民，一個盧X雪，已經唔想睇。
EliseElise：低俗講波團，我覺得好似去在bar睇波咁，成班唔知有乜嘢point嘅閒談咁，同好嘈，唔啱我。
I.Rakitic：克羅地亞啲人變晒無名氏，成場幫巴西，黑都講成白，上網睇好過。
資料來源：各大討論區
有邊幾場冇得睇
四年一度的世界盃，今年由無綫獨家播放64場賽事，但有多達42場賽事不會在免費頻道播放，當中包括最重要的分組賽第三場關鍵賽事，以及八場16強賽事均不會在免費頻道播放，由6月21日開始整整兩星期，免費頻道出現世界盃真空。直至7月5日才播放其中兩場8強賽事，季軍爭奪戰也不作免費播放，令人遺憾。
14/6
智利VS澳洲
17/6
伊朗VS尼日利亞
加納VS美國
18/6
俄羅斯VS南韓
19/6
喀麥隆VS克羅地亞
20/6
日本VS希臘
21/6
意大利VS哥斯達尼加
瑞士VS法國
洪都拉斯VS厄瓜多爾
22/6
阿根廷VS伊朗
德國VS加納
尼日利亞VS波斯尼亞
23/6
比利時VS俄羅斯
南韓VS阿爾及利亞
美國VS葡萄牙
24/6
荷蘭VS智利
澳洲VS西班牙
喀麥隆VS巴西
克羅地亞VS墨西哥
25/6
意大利VS烏拉圭
哥斯達尼加VS英格蘭
日本VS哥倫比亞
希臘VS科特迪亞
26/6
尼日利亞VS阿根廷
波斯尼亞VS伊朗
洪都拉斯VS瑞士
厄瓜多爾VS法國
27/6
葡萄牙VS加納
美國VS德國
南韓VS比利時
阿爾及利亞VS俄羅斯
29/6至2/7
8場16強賽事
5/7
其中一場八強賽事
6/7
其中一場八強賽事
13/7
季軍爭奪戰
識睇 一定睇蘋果嘅足動世盃：
http://worldcup2014.appledaily.com/