日本名牌球證西村雄一的爭議判決，造就巴西前鋒尼馬成為國家英雄。避過領紅牌一劫的尼馬上下半場各建一功，包括一球問題12碼，協助主辦國巴西周四於世盃揭幕戰以3:1反勝克羅地亞，暫以3分排A組榜首。
巴西對上8屆決賽周首戰全勝，加上主場，故賽前被一面倒看好。教練「大菲」史高拉利以去年洲國盃決賽贏西班牙的原陣鬥克羅地亞，奧斯卡杜斯山度士於中場領軍，尼馬則夥拍侯克及費特打進攻。然而，馬些路於11分鐘將克羅地亞前鋒奧歷的左路底線傳中踢入自己網窩，令在場逾60,000球迷鴉雀無聲。
去到27分鐘，尼馬與克羅地亞中場莫迪歷爭波時蓄意開踭，後者應聲倒地，但日本名哨西村雄一卻只罰黃牌。尼馬逃過領紅一劫，兩分鐘後禁區頂左腳地波射死角，皮球中內柱入網，為巴西追成1:1。
打踭插水全睇漏
比賽去到69分鐘，西村又有爭議判決。當時費特禁區內被克羅地亞中堅洛夫雲從後拉跌，西村直指12碼，但電視重播顯示雙方只有輕微接觸，費特有插水之嫌。曾於98及02年世盃決賽周執法的瑞士退休球證美亞就此表示：「費特應該因『插水』而被罰黃牌。」尼馬負責操刀，雖然被門將派迪高沙撲到，不過仍能入網，令巴西反超前2:1。去到補時1分鐘，奧斯卡禁區頂地波「篤」入死角，為巴西埋齋兼贏3:1完場。
文：青蛙仔
【622公投 我撐普選】 毅行直播
流動版網頁︰ http://622popvote.appledaily.com