今屆世界盃雖然星光熠熠，但係一舉一動都可以牽動球迷情緒嘅星中之星就一隻手數得晒，其中葡萄牙國家隊隊長基斯坦奴朗拿度（C朗）就肯定係其中之一。呢名皇家馬德里前鋒早前傳出傷癒可以趕及喺下周一對德國嘅分組賽，球迷都鬆一口氣，但喺日前，佢練習時早退兼且要喺左膝敷冰，就令球迷好鬼擔心。
C朗喺剛結束嘅球季季尾，一直都受傷患影響，加上之前一直無法喺葡萄牙嘅熱身賽披甲，當時已有傳29歲嘅佢未必趕得切踢下周一對德國嘅分組賽。
不過，喺葡萄牙對愛爾蘭嘅最後一場世盃熱身賽，C朗終於復出兼擔正，正當全世界球迷等住睇佢點撕破德國嘅後防時，C朗喺周四嘅球隊操練，操咗唔夠20分鐘就要早退，左膝又要敷冰兼表情痛苦，真係睇到我求大俠心都離埋。須知道葡萄牙冇咗C朗，戰力當堂會冇咗一大半，到時仲點頂德國呀？
究竟C朗嘅傷勢如何，暫時仲未清楚，但葡萄牙足總為咗球員可以住得舒服嘅呢番苦心，就係人都見得到，皆因葡萄牙國腳唔單止個個都一人一房，而且佢哋入住嘅酒店房仲間間都喺牆上面噴咗入住球員嘅名同埋號碼，又掛上佢哋嘅比賽照片，真係名副其實「賓至如歸」。唔怪得一眾葡萄牙國腳好似中場摩天奴咁，都喺社交網頁上載酒店房嘅相嚟晒命啦！
路維晒陣未驚過
至於葡萄牙喺下周一嘅對手德國，喺周四就全隊輕輕鬆鬆咁喺入住嘅酒店睇世界盃揭幕戰。另外，德國國家隊主帥路維喺記者會上，仲講到明會推國家隊隊長拿姆上前踢防中，即係好似佢喺拜仁慕尼黑咁，而佢嘅拜仁隊友小豬舒韋恩史迪加，則要退居後備先。路維仲話到明會排4-2-3-1陣式，如果佢唔係出口術，就真係對麾下球員好有信心，唔怕葡萄牙作出針對性部署。
識睇 一定睇蘋果嘅足動世盃：
http://worldcup2014.appledaily.com/