此文見街時應該係星期六凌晨，B組開戰西班牙對緊荷蘭，睇盤真係「和味濃」，一比一和波收場格。
至於同組智利對澳洲，晨早6點天光，我會開住兩國紅酒飲，直至完場，如果澳洲連呢關都守唔到，可以提早幫佢奠酒。呢場打完應該晨早8點未到，瞓唔着嘅球迷除咗落茶記吹水同度盤之外，可以參加「毅行爭普選」，8點鐘中環遮打花園出發搭船去九龍西再行，直至夜晚8點，歡迎隨時加入。
行足12小時似乎好甘，但同一晚要連睇四場波嘅你亦都唔弱。零時首場大毒梟對聖鬥士（入球細冇走雞）、次場烏龜對哥斯拉（勢必狂攻盡攞分）、6點鐘第三關重頭戲就到炸魚薯條對意粉（應該冇乜波入，建議落茶記隊咖啡全場一齊悶一齊×）、朝早9點象牙對壽司（可以博先主後和），打完都已經接近中午，記憶中近幾屆都未試過一日連續四場波咁甘，睇完可以昏迷。
呢類禁閉式嘅睇波生活，四年玩一次固然過癮，但另一位只有禁閉而冇波睇嘅長毛，我哋會記得呢位球迷為咗對抗遞補機制，今屆要坐波監，放監當日已經去到16強尾聲。呢次監禁真係一雞幾味：冇得參加6月22投票、7.1遊行、被剪髮、仲要失去睇波權，真係要學阿GEM講句：「使唔使呀？」今年世界盃橫跨以上日子，大家生活喺巴西時區亦要記得喺香港做嘢。
文：梁柏堅
【622公投 我撐普選】 毅行直播
流動版網頁:
http://622popvote.appledaily.com