工程系學生H行將往美國交換一年，學校在紐約州東北部，冬天天寒地凍，大雪紛飛，四十幾年前在呢間S大學攻讀嘅老校友W俾足晒面學生H嘅姑姐，特別肯見佢一面，指點迷津，學生H自然恭恭敬敬受教。
記得學生H幼時拙於言詞，到兩歲仲未識開口講嘢曾令父母擔心，與小YY個女未夠17個月大，已經識得指住四千呎高空叫一聲airplane（飛機經過沙田飛往赤鱲角）以及識講「開門、開門」，不可同日而語。學生H見到，不禁自嘆一句：「我輸在起跑線上！」佢父母聽見，幾乎笑到噴飯，想當年，學生H乜都唔識，只識猛𡁻白飯，父母其實好驚佢係遲熟嬰兒，入學讀書會係逢二進一格。點估得到，呢位小時候作文，只識將功課紙填滿格仔，成張紙只有一個字，就係「哥」，同佢補習中文嘅表哥為之暈得一陣。
唔好理，如此輸在「起跑線上」嘅學生，升完一班又一班，成為第一屆中學文憑試考生，一試即中，考入中大，全家喜出望外。呢日佢又講輸在起跑線，左丁山特別同佢講：「你係出閘大脫腳嘅典型，但識得跟住跟住，唔俾前面啲馬拋離，入到直路識得發力，在終點線前低頭一衝，咁就得咗，呢啲叫做輸在起跑線，贏在終點線，笑得最後，笑得最甜，輸在起跑線無甚大不了。」
不過小YY係新派媽咪，就驚住子女輸在起跑線，個女咁細就要帶去參加playgroup，又話要研究不同幼稚園入學申請方法。左丁山已經係老派咯，唔敢評論，但是學生H、學生Y與遠在紐約嘅小B，加埋堂兄弟，幼時入讀靈糧堂幼稚園，小YY讀白普理，肥仔K讀啟思，好似間間都冇功課做，唔強迫學習，佢地讀得非常輕鬆開心嘅噃，𠵱家咪個個都幾好，冇乜輸蝕呀，何解今天家長堅決認為子女升小學之前就要識得幾百個中英文字呢？原因只係恐怕子女輸在起跑線上，有peer group pressure!美國前財長/哈佛校長森瑪斯教授於6月9日在FT有一篇短文，講美國富裕家庭孩子在成長期間，平均參加6,000小時課外/校外活動，如參觀博物館、體育運動、聽阿媽讀故事等等等，窮家子女就無此幸福，故此形成「機會不公」，促進貧富懸殊喎。香港家長讀完此文，睇怕會更加催谷下一代咯！
識睇 一定睇蘋果嘅足動世盃：
http://worldcup2014.appledaily.com/