世界盃終於開波啦！巴西就喺揭幕戰驚濤駭浪咁贏3:1，成場波快上快落絕無悶場，完全感受到世盃嗰種熾熱同緊張嘅氣氛。就連班森巴兵都喺上半場緊張到亂晒籠，係咁出錯，馬些路更擺烏龍，送個大禮俾克羅地亞，冇嘢吓嘛！好彩下半場我愛隊返番嚟，不枉我捱夜捧場，識睇一定係睇世界盃啦！
至於你哋又慣咗喺半夜4點睇波未呢？仲覺得辛苦到嘔電呀？嗱！我咪話過有睇波「提神3寶」（圖）醒你哋嘅，靠呢3個護法，正常都頂到90分鐘㗎，除非場波好悶啦！
第一寶就係能量飲品，開波前先啪番樽，醒一醒腦，先頂住頭45分鐘；半場果時，球員入更衣室，你就入廁所用埋第二寶，就係沖個凍水涼，刺激吓個人將啲疲勞帶走；最後下半場喇，我會𡁻香口膠，想威力加強就買啲最堅嘅超薄荷，咁睇一場波就輕輕鬆鬆鄧梓峰啦！總之3寶一出，睇晒咁多場波都冇難度！
另外，聽日就係父親節同埋我哋橫檳FC（香港）爭U18足總盃嘅大日子，喺度祝各爸爸都咁快樂，我就梗係要爭番個盃嚟送畀阿爸啦！
文：陳子樑
識睇 一定睇蘋果嘅足動世盃：
http://worldcup2014.appledaily.com/