黃瑞紅總是教兒子要將心比己，每個小朋友都有自己鍾愛的玩具，有些孩子願意分享，有人喜歡獨享，不能強人所難，「你唔可以因為咁樣而嬲佢」，叫他明白甚麼叫互相尊重。明天一家三口將出席「一點粉紅」活動，她希望下一代能在一個平等共融的環境下成長，「呢秒鐘你係主流嘅人，唔擔保下一秒你唔係主流，咁你係唔係就要被排斥、標籤同歧視呢？」
大學法律課首要熟讀《世界人權宣言》：「人人生而自由，在尊嚴和權利上一律平等……不分種族、膚色、性別、語言、宗教、政治……」黃瑞紅牢牢記住至今。當上大律師，處理過性別、殘疾歧視案件，她發現一切源於人對人的標籤，「如果我哋接納殘疾人士、唔同種族、宗教嘅人免被歧視，點解不同性傾向嘅人可以被歧視、可以被擺埋一邊，隔離佢、切割佢？」
身為一子之母，黃瑞紅常說，永遠不知道下一秒你的兒子會變成怎樣，可能不幸傷殘、變成單親、又或是喜歡上同性，甚至到外國留學成當地少數一群，沒有父母甘於子女被取笑和欺凌，「一個存在歧視嘅社會，都唔係一個對小朋友健康成長嘅合適環境」。
恐同團體斥一點粉紅活動鼓吹同性戀，黃瑞紅眼中，每個人生而平等，「莫非我唔應該帶18歲以下嘅小朋友，去接觸殘疾小朋友？同佢保持距離？或者叫佢唔好接觸少數族裔？」
她說並非要把不同性傾向人士「捧上神枱」，若然在教育政策上大肆宣揚同性關係有多好，「我一定會反對，呢個係洗腦」。她帶同兒子參與平權運動，是讓他建立平等價值觀，也是香港的核心價值，沒有人有權去標籤誰較誰優越或「正常」，「每個人都有唔同，冇話邊一級高過邊一級，否則我哋就返番去印度最恐怖以人去分等級」。
反對強加信仰於他人身上
很多恐同人士都以宗教作理據。沒有宗教信仰的黃瑞紅，最近便買了三本不同版本的聖經，嘗試了解箇中真諦。還未看完但有感而發，她說聖經有十誡，也相信不少人犯了十誡，「係咪唔會同佢接觸？」她說基督教最大信仰是愛和寬恕，而非審判；她尊重有信仰的人，但不認為應以信仰強加於非信徒身上。正如每個人的生命，誰有權去操控？
識睇 一定睇蘋果嘅足動世盃：
http://worldcup2014.appledaily.com/