【本報訊】那一點粉紅，象徵多元、共融和平等的普世價值，卻被恐同團體玷污成推動性解放、鼓吹同性戀的標籤。兩個家庭，一攣一直，一同出席明天舉行的「一點粉紅」活動。育有一子的大律師黃瑞紅說，要為下一代建立平等包容的社會，「你唔知下一秒鐘，你小朋友會唔會被人歧視」；由出櫃到爭取平權，何家爸媽都站在一線，以她為傲，「無論仔女係點，你都想佢幸福」，何韻詩父母說。
記者：王家文
談同性戀，何爸爸打個比喻，一個人只喜歡吃牛肉，為何強迫他食豬肉，簡單易明。但有些人會說，我不吃牛肉，為何要迫我接受？何媽媽說，沒人迫你轉口味，只希望你別歧視吃牛肉的人。女兒出櫃、面對惡言，二人處之泰然，因為他們相信同性戀沒有錯，有個同志女兒不算甚麼，「身為父母，無論仔女係點，你都想佢幸福」。何韻詩應該好幸福。
明天是父親節，何家爸媽與女兒一同出席「一點粉紅」活動，就是那個被恐同團體醜化成推動性解放、鼓吹同性戀的活動。何媽媽說：「同性戀唔係傳染病，唔會因為我講多兩句，你忽然由鍾意異性變鍾意同性。」女兒已出櫃，這次出來是要支持不同性傾向人士，因為他們都有家庭，「佢哋需要更加多人去關愛，容易走呢條路」。
「你係咪想佢幸福」
夫婦退休前都是教書，何爸爸教男校，對同性戀不陌生，1988年移居加拿大後更見慣不怪，彼此尊重，「你唔會影響我嘅生活、身體，咁有乜問題？」換轉其他家庭，有個同志仔女，阿媽哭崩，老竇黑面，「係世俗問題，唔係阿爸阿媽接受唔到，係佢哋驚姨媽姑姐、朋友、外面人話：『哎吔，你個仔係gay，你個女係lesbian。』喂大佬，關你乜事？」
聲若洪鐘的何爸爸突然放慢溫柔，「坦白講，同志有乜嘢錯？」若子女天生智障，父母總設法保護他免受歧視，「點解一個五官端正，身體冇問題嘅男仔或女仔，因為佢嘅性取向，而影響到父母唔愛護佢呢？」何媽媽接觸過不少同志孩子，怯於向父母坦白，躲在衣櫃不見光明。她說無論是直是攣，都是親生骨肉，「究竟你係咪真係愛你仔女？」一句到尾，「你係咪想佢幸福？」
逾半小時訪問何爸爸重複了四次，「我哋兩公婆唔係鼓吹同性戀，出嚟係話畀你聽，大家係平等」。女兒年半前公開剖白：「我好驕傲講一聲：我係同志。」何爸爸與有榮焉，「終於舒咗一口氣」。何媽媽說，女兒的坦承沒有將同性戀無限放大，只為建立平等共融的社會，「身為佢媽媽，我都係驕傲」。她說父母的愛是無條件，「無論仔女係乜嘢狀況，父母喺後面可以撐住，點都會畀到啲力量佢」。有這樣的父母，都說，何韻詩很幸福。
【622公投 我撐普選】 毅行直播
流動版網頁:
http://622popvote.appledaily.com