【本報訊】年屆82歲的天主教香港教區榮休主教陳日君樞機，明天起開始一連七天的毅行，用雙腳為特區爭普選。陳樞機昨狠批中央推出的「一國兩制」白皮書內容「好離譜」，聲言：「你（中共）可以綁住我、可以拉我走、可以斬我頭，但做奴隸，我就覺得唔應該」，指市民不應認命，6.22須投票爭普選。
直斥白皮書不尊重港制度
陳樞機昨接受D100訪問時稱，香港若按白皮書所言落實普選，即等於無真正選擇，要香港人做奴隸，直斥白皮書內容完全不尊重香港的制度，諷刺撰寫者「可能真係唔夠料，對香港理解好差」，笑稱：「我覺得今次（毅行）可以多一個口號：行出一步來，『支持』白皮書，但『支持』兩個字要倒轉來寫。」
陳樞機指港人不應認命，「要保持自己尊嚴，認命嘅後果好危險，唔可以跪低，因為一跪低就玩完」，希望今次白皮書能令更多港人醒覺，參與6.22投票。
陳日君更表示：「對白皮書感到不滿嘅香港人，投票係一個表態機會。」「唔行出嚟，肯定唔成功，行出來（投票），可能會有奇蹟發生，所以悲觀裏面都要堅持」。
指泛民過份妥協 都係輸
問及港人應否就普選向北京政府妥協，陳樞機坦言目前看不到妥協空間，「我哋唔用暴力就係妥協、就係底線」，又指泛民若與中共過份妥協，「其實都係輸咗，香港人唔欣賞」，希望他們透過互相鼓勵，「堅持原則，唔好投降」，「若政黨為咗眼前好處，客觀上讓步咗，係好危險，老百姓都會睇到」。
陳樞機憶述年輕時經常行山，「後生時，香港1948年，冇乜人行山，我哋時時行山，後來仲帶埋學生行山，行獅子山都好平常，所以行慣咗」，故此「對行路方面好捱得」，笑稱已為毅行作好準備，「我唔行得快，但可以行好耐」。
陸續有教友將鼓勵陳樞機毅行的相片上載至「公教青年人，齊齊撐毅行」fb專頁。夏其龍神父亦會參與17日的毅行。fb管理員鍾先生稱，「年紀咁大嘅陳樞機都咁唔錫身，為普選去毅行，所以都希望多啲教友陪樞機一齊行」。一班公教青年人則在今晚8時半，於九龍方濟會院舉行「毅行撐普選」祈禱會，為樞機、毅行人士及民主前途祈禱。
【壹錘定音】星期一至五，早上8點開咪！
http://hammerout.hk
立即更新《蘋果動新聞》app
https://bitly.com/AppleDailyiOSApp
https://bitly.com/appledailyandroidapp