賣開風筒與美髮產品嘅建福集團（464）噚日喺中環開咗間叫BELLESA嘅Styling Bar，主席林偉明話，舖頭只提供set頭同埋化妝服務，唔會幫客剪、電、染，主要方便一班喺中環返工嘅OL放工去蒲之前，可以大變身。
佢話，呢類髮型造型店喺歐美好流行，但係香港就冇人搞，所以今次投資200萬元，喺中環租咗個1,500平方呎樓上舖，用自家出品嘅風筒、造型髮夾等產品幫客set頭，幫公司建立一個新招牌。
至於幾時開分店，佢話未有具體時間表，但係地點會揀中環、銅鑼灣同尖沙嘴三個主要蒲點。中環呢間舖入面，除咗設有VIP房，仲提供包場服務，方便一班朋友齊齊扮靚。林生雖然係賣風筒出身，但平時喺公司都會幫同事整頭，應該吸取咗唔少經驗先開舖喎！
識睇 一定睇蘋果嘅足動世盃：
http://worldcup2014.appledaily.com/