杜德偉（Alex）昨日在W酒店為8月16日的「極杜世界巡迴演唱會」舉行記者會，並宣佈加開17號一場，大會送了一條紅底褲給Alex。除了太太Ice到場支持外，連舊愛吳君如亦現身撐場，她更送上一隻叫「極杜duck」的金鴨並笑說：「呢隻金鴨寓意佢極度靚仔極度fit，金光閃閃。」君如在台上大爆杜德偉每次見到她都有點尷尬，她笑說：「係咪仲有心跳感覺呢？我今日係嚟支持你，不過唔好搵我做嘉賓，我一把年紀，同埋我一唱歌嚇親人，我聽到你之前話要喺台上倒吊我，我驚你搵我報仇呀，總之你加幾多場，我都會一家嚟睇！」
「我比較慢熱」
事後君如被問大爆Alex尷尬一事，她笑言:「由我第一日識佢，佢個樣已咁尷尬，唔知係咪我個樣好有威嚴呢？」Alex亦稱：「我個人比較慢熱，而且啱啱喺台上見到佢，唔知佢會講乜嘢。」後來，談到好友蘇永康於12月2日結婚，Alex說：「佢未打畀我，而且佢近來出碟忙宣傳，唔喺香港，佢都知我忙緊搞個唱。」至於表演嘉賓方面，Alex表示希望邀請葉蒨文，不過因對方身在加國，可能會有點難度，不過有人提議不如邀請蘇慧倫，Alex口快快地說：「暫時未諗到呢位，不過佢結咗婚喇，唔知係咪有朋友……」未知是否怕講多錯多，他即轉口風說：「唔知佢係咪有小朋友，不過唔知呢、總之希望兩場有唔同嘉賓，希望大家有驚喜。」
採訪：張俊銘
攝影：仇志德
識睇 一定睇蘋果嘅足動世盃：
http://worldcup2014.appledaily.com/