港交所（388）行政總裁李小加平日現身都係着住西裝官仔骨骨，見佢着便服嘅機會都少，更何況着住波衫，成頭大汗亂糟糟。
其實李小加十分熱愛足球，佢加盟港交所後，一有時間、唔使出差嘅話，就會跟同事落場踢波。上月底港交所參加「香港公平貿易聯盟」舉辦嘅企業慈善五人足球賽，52歲嘅李小加亦跟同事一齊落場。
港交所一直有隊員工足球隊，不時跟證監會嘅足球隊打友誼波，2010年底甚至同深圳交易所比賽過，不過，呢幾年兩個交易所都好忙，好耐冇約埋踢友誼波嘞，如果可以踢多幾場加深友誼，唔知「港滬通」係咪應該有埋深交所份呢？
講番港交所上月底參加公平貿易嘅五人足球賽，總共有12間公司組隊參加，港交所與捷成洋行打入決賽，結果港交所4比2獲勝，李小加雖然負責做前鋒，不過呢場就冇入到波。
識睇 一定睇蘋果嘅足動世盃：
http://worldcup2014.appledaily.com/